Azterketaren deskribapena
Irakurmena
Egitekoa: Emandako testua edo testuak irakurri ondoren, azterketariak
zenbait galdera erantzun beharko ditu. Testuaren ulermen orokorra,
xehea, informazioa testutik ateratzea, idazlearen jarrera eta gaia
bereiztea edota bestelako osagai linguistikoak ulertzea eskatuko zaio
azterketariari. Erantzun okerrengatik ez da punturik kenduko. Zati honek
20 puntu izango ditu denera eta gainditzeko 10 puntu lortu beharko
dira. Atal honen iraupena 45 minutu ingurukoa izango da.
Idazmena
Egitekoa: Azterketariari egoera bat emango zaio eta gutxienez 200
hitzeko testu bat edo 150 inguruko bi testu idatzi beharko ditu. Testuak
oharrak, gutun informalak eta formalak, kontakizunak, deskribapenak,
azalpenak, kronikak... izan daitezke. Idatzien ebaluaziorako irizpide
hauek hartuko dira kontuan: a) balorazio orokorra, b) hizkuntza
baliabideak, hizkuntzaren aberastasuna eta egokitasuna, eta c)
zuzentasuna. Zati honek, gehienez, 30 puntu izango ditu eta gainditzeko
15 puntu lortu beharko dira. Atal honen iraupena 60 minutu ingurukoa
izango da.
Bi atal horiek batera, gehienez, ordubete eta berrogeita bost
minutuko iraupena izango dute.
Entzumena
Egitekoa: Azterketariak eguneroko bizitzako edo ohiko gaien inguruko
hainbat testu grabatuta entzungo ditu. Testu horien ulermena frogatu
beharko du, egingo zaizkion zenbait galderari erantzunez. Testua luzea
izan liteke (5/6 minutu ingurukoa, bi zatitan) edo zenbait testu labur
(minutu bat ingurukoak), minutu-kopurua osatu arte. Testuko ideia
nagusia jasotzen jakin beharko du, informazio garrantzitsua bereizten
edota xehetasun batzuk nabarmentzen. Jakin ere jakin beharko du
hizlariaren jarrera eta informazioa bereizten eta testuari dagozkion
ondorioak ateratzen. Zati honek 20 puntu izango ditu denera, eta
gainditzeko, gutxienez, 10 lortu beharko dira. Atal honen iraupena 25
minutukoa izango da, gehienez.
Mintzamena
Egitekoa: Azterketariak elkarrizketa bat izango du aztertzaileekin
edo beste azterketari batekin. Probak hiru aldi izango ditu: a)
aztertzaileen galderak, sarrera gisa, b) azterketariak aurrez
prestatutako gai baten azalpena eta c) gai batekin lotutako
elkarrizketa, argazkiak oinarri hartuta.
Atala neurtzeko irizpideak hauek izango dira: a) hizkuntzaren
egokitasuna eta jariotasuna, b) hizkuntz baliabideak, diskurtsoaren
antolaketa eta elkarreragina, eta c) hizkuntzaren aberastasuna eta
zuzentasuna. Gehienez 30 puntu izango ditu atal honek, eta gainditzeko
15 puntu beharko dira. Azterketariak 10 minutu izango ditu gaia
prestatzeko eta 10 minutu inguru proba egiteko.
