KERMAN: Aizu, neska!, neska!, barkatu
HAJAR: Bai?
KERMAN: Barkatu, barkatu. Badakizu hemen inguruan banketxerik badagoen? Atzerritarra zara, ez?
HAJAR: Bai.
KERMAN: A bai? Orduan, igual, hobeto erdaraz, ez?
HAJAR: Ez. Lasai. Ni ere... euskaraz!
KERMAN: A bai? Euskaraz dakizu? Ba, zuk bai daukazula meritu handia. Hemen, mundu guztiak daki euskaraz, nik ezik. Eta nongoa zara?
HAJAR: Jatorriz Marokokoa. Baina Euskal Herrian bizi izan naiz betidanik. Orduan, herrikoa.
KERMAN: A! Eta banketxea non dago?
HAJAR: Hemen bertan. Nik nahi baduzu, lagunduko dizut.
KERMAN:    Bale. Ai! Traste guztiak hartu ditut, kartera ezik. Kartera etxean utzi dut eta burua ere bai.

Gogoratu EZIK partikulari, salbuespena adierazteko, IZAN ipini behar diogula. Traste guztiak hartu ditut, kartera IZAN EZIK esango dugu. Txartzat emango dugu, horrenbestez, traste guztiak hartu ditut, kartera ezik, bezalako esaldiak.

KERMAN: Bide batez, ni Kerman naiz. Eta zu?
HAJAR: Ni Hajar
KERMAN: A! Hajar. Aizu, Hajar, nire lagun baten zorionak dira eta festa bat antolatu dugu. Nahi duzu etorri?
HAJAR: Bueno, aber, ikusiko dugu. Ez dakit nola hartuko nauen zure lagunak
KERMAN: Lasai, e? Nire lagunari asko gustatzen zaio bere urtebetetzea jende askorekin ospatzea. Animatu! Benga, etorri! Baietz!
HAJAR: Bueno, bale. Ikusiko dut
KERMAN: Aizu, eta zure zorionak noiz dira?
HAJAR: Urtarrilaren 22an. Eta zurea?
KERMAN: Nik, abuztuaren 21ean. Nire urtebetetzea, abuztuaren 21ean. Eta gaur, Mikel Pabloren zorionak dira. Horregatik, opari bat erosi nahi diot eta... ai ama! Ahaztu egin zait, ez daukat dirurik!

Mikel Pabloren urtebetetzea da. Edota, Mikel Pabloren urteak dira esango dugu. Urtebetetzeetan, zorionak! Eta, urte askotarako! Esaten badugu ere, ez dugu esango Mikel Pabloren zorionak dira, forma hori ez baita zuzena.

KERMAN: Mundu guztiak eramango du opari bat, nik izan ezik. Eta Mikel Pabloren urteak dira. Nola joango naiz ni oparirik gabe?
HAJAR: Bueno, lasai. Mikel Pablok ulertuko du.
KERMAN: Bai, ulertuko du, ulertuko du. Normalean oso ulerkorra da, opariekin izan ezik.  
HAJAR: Eta berak zer oparitu zizun zure urtetan?
KERMAN: Liburu suediar bat. Ederra.
HAJAR: Baina, zuk ba al dakizu suedieraz?
KERMAN: Ez. Bueno, hizkuntza askotan dakit gauzak esaten: hello, bonjour, buon giorno, aufwiedersehen, salam malekum, suedieraz izan ezik.
HAJAR: Orduan, zergatik oparitu zizun Mikel Pablok liburu bat suedieraz?
KERMAN: Ba, begira, orain arte ez diot inori kontatu, zuri izan ezik, e? Baina, gu bion artean, nik uste dut Ikean hartu zuela.

Gaur Kerman kartera ahaztuta atera da etxetik. Traste guztiak hartu ditu, kartera izan ezik. Gogoratu salbuespena adierazteko, EZIK partikulari IZAN jarri behar diogula derrigorrez. Horrez gain, Mikel Pabloren urteak direla edo Mikel Pabloren urtebetetzea dela kontatu digu. Gogoratu norbaiten zorionak direla esatea ez dela zuzena. Zorionak, besteak beste, urtebetetzea zoriontzeko erabiltzen dugu. Eta zuek, euskaraz hitz egiteko edozer egin dezakezue, lotsatu izan ezik.

Horretarako, honekin edo harekin, baina egin!