KERMAN: Zer? Mikel Pablo! Bai. Non nagoen? E, inon, inon. Norekin? Inorekin. Mendira etorri naiz eta galdu egin naiz. Zertara etorri naizen? Bada, ezertara. Ez, ezertara ere ez. Okerrena da kristoren gosea daukadala eta ez dudala ezer ez ekarri jateko. A!, begira, baserri bat. Mikel Pablo, sagar bat edo piku bat edo hartzera noa. Bai, agur, agur.
BASERRITARRA: Aizu, nora zoaz?
KERMAN: E? Inora ez, benetan.
BASERRITARRA: Zertan zabiltza nire baserrian?
KERMAN: Ni? Ezertan ez.
BASERRITARRA: Iruditu zait sagarrak lapurtu nahi zenituela.
KERMAN: Nik? Inola ere ez. Ez dut ezer hartu. Begira, begira.
BASERRITARRA: Galduta al zabiltza? Nahi duzu zerbaitetan laguntzea?
KERMAN: Ez dut jateko ezer ez ekarri eta... bada, hau hartu dut.
BASERRITARRA: A! Bale, bale.

Gogoratu EZETZ esateko edota UKATZEKO beti jarri behar dugula EZ. Horrenbestez, Zertan ari zara? Galdetzen digutenean, EZERTAN EZ erantzungo dugu. Baina, kontuz! Beti ipini behar dugu EZ, baina, behin bakarrik EZ dut jateko EZER ekarri, esango dugu. Horrenbestez, EZ dut jateko EZER EZ ekarri, ez da forma zuzena izango.

BASERRITARRA: Mutil, esaten ahal zenuen! Nik prestatuko dizut zerbait, e!
KERMAN: Ai, baina, ez dizut lanik eman nahi, e? Elkar artean prestatuko dugu. Bueno, hori bai, e? Biok artean. Oso sukaldari txarra naiz.
BASERRITARRA: Sukaldari txarra? Orduan, nire sukaldean ez zara sartuko. Sagar bat emanen dizut eta honekin tripa pixka bat beteko duzu.
KERMAN: Ai, eskerrik asko. Hemen, orduan, guztiok artean egiten duzue lan?
BASERRITARRA:    Hori da. Eta orain, zu ere hasiko zara, eta txerriei jana ematen hasiko zara.
KERMAN: Aizu, baina, nik ez dakit hau egiten. Nik uste nuen biok artean egingo genuela.
BASERRITARRA: Bai. Bion artean egingo dugu. Zuk egin eta nik gainbegiratu.
KERMAN: Ai ama! Eske, ez utzi bakarrik, e? Nik uste nuen hemen dena denek artean egiten zenutela
BASERRITARRA: Lasai. Lagun artean uzten zaitut eta!
KERMAN: Bai. Kaixo! Hartu! Kurrin, kurrin!

ARTEAN postposizioak, oro har, NOREN kasua eskatzen du. Bazkaria guztioN ARTEAN prestatuko dugu, izango da forma zuzena. Eta, BioN ARTEAN egingo ditugu etxeko lanak. Baztertzekoak izango dira, hortaz, GuztioK ARTEAN, edota, bioK ARTEAN, bezalako esaldiak.

 
KERMAN: Tori! Ai, Algortara joaten naizenean ez diot inori ezer kontatuko. Ezertxo ere ez! Ja, Eta Mikel Pablori, gutxiago. Ezin da ezertaz enteratu. Inola ere ez! Hala, kurrin, kurrin! Ya está!  
BASERRITARRA: Nora zoaz, Kerman?
KERMAN: Inora ez.
BASERRITARRA: Zertan zabiltza?
KERMAN: Ezertan ez. Hemen, gure artean solasean. E, txerritxo? Bazkaldu duzu, bapo gainera, e? Bai.
BASERRITARRA: Goazen. Bazkaldu aurretik behia jetzi behar dugu.
KERMAN: Bion artean egiten badugu...
BASERRITARRA: Ez al dakizu bakarrik deus egiten, edo zer?
KERMAN: Eske, ohitura galdu dut. Eta mintzapraktikak du errua e? Zeren, beti, bi pertsona behar izaten dira hitz egiteko. Bien artean praktikatzeko. Ulertzen duzu?
BASERRITARRA:  Animo! Bukatutakoan emango dizut baso bat esne eta txerriaren odolki bat.

Gaur, Kerman Leitza ingurura joan da mendira eta galdu egin da. Zer egin duen? Bada, ezer zuzenik ez gaur ere. Gainera, INORekin, EZERekin, INORA eta honelako formulekin nahastu egin da. Gogoratu honelako formulei EZEZKO adiera emateko EZ partikula ipini behar dugula. Adibidez, Nora joan zara? INORA EZ Zertan ari zara? EZERTAN EZ Baina, kontuz! EZ partikula hori behin bakarrik jarri behar dugu: Kermanek EZ du EZER esan. Ezin dugu EZ hori bi aldiz jarri: Kermanek EZ du EZER EZ  esan. Zeren, bestela, bi EZ horiek talka egiten dute. Bestalde, Kristina eta bien artean baserriko lanak egin dituzte. Gogoratu, oro har, NOREN ARTEAN  esaten dugula. Beraz, BioN ARTEAN egingo ditugu lanak. Edo, GuztioN ARTEAN prestatuko dugu bazkaria. Eta ez, BioK ARTEAN, edo, guztioK  ARTEAN. Hori bai, guztion artean errazago ikasiko dugu euskaraz.

Beraz, badakizu,  honekin edo harekin, baina egin!