Osatuz egitasmoa euskara ikasten ari diren osasun-arloko langileentzat sortutako ikasmaterialek osatzen dute. Ikasmaterialok HABEren eta Osakidetzaren ekimenez gauzatu dira.
Osatuzen helburu nagusia osasun-arloko langileak euskaraz komunikatzeko gai izatea da, bai lan-ingurunean eta baita hiritarrekiko harremanetan ere. Eta hori lortzeko asmoz hiru ikasmaterial sortu dira: Osatuz aldizkaria, Osatuz irratsaioak eta Osatuz web gunea. Hiruak euskaltegian eta euskalduntze orokorreko prozesuan erabiltzen diren ikasmaterialen osagarri dira eta ikasleek nork bere aldetik erabiltzeko moduan daude prestatuak.
Osatuz aldizkariak, osasunaren inguruko edukiak eskaintzeaz gain, gaur egungo gaiak ere jorratzen ditu.
Eskaintzen dituen edukien artean honakoak azpimarra daitezke: profesionalei egindako elkarrizketak, osasun-gaiei buruzko artikuluak edota kontsultan suerta daitezkeen egoeren elkarrizketa-moldeak.
Aldizkaria didaktikoa da, eta artikuluak ulertzeko hiztegia eta hizkuntza lantzeko ariketak ditu. Proposatutako ariketa guztiek zuzenketa-orria dute.
Ale bakoitzak Osatuz Orokorra eta Osatuz Pediatria ikasmaterialetan oinarritutako auto-ikaskuntza gidak ditu gehigarri.
Ikasmaterialak Osakidetzako 2. Hizkuntz Eskakizuna prestatzen ari den edozein profesionalentzat dira egokiak. Baina, hala ere, Osakidetzatik at dauden osasun-zentroetako langileek edota osasun-arloko unibertsitateetako ikasle eta irakasleek euskararen erabileran trebatzeko erabil dezakete.
Osatuz euskaldun berri nahiz zaharrentzat da baliagarri, osasun-zerbitzuen egunorokoan sortzen diren hizkuntz beharrei erantzuten baitie.
